International

Al-Mahmoudi kurejeshwa nyumbani-Libya

Aliyekuwa waziri mkuu wa Libya Al-Baghdadi al-Mahmoudi

 Mahakama ya rufaa mjini Tunis, imeidhinisha kusafirishwa hadi nchini Libya kwa aliyekuwa waziri mkuu nchini humo, Al-Baghdadi Al-Mahmoudi.

"Si uamuzi wa haki, ni uamuzi wa kisiasa," wakili wake, Mabrouk Korchid, aliambia shirika la habari la Reuters.

Ombi la kurejeshwa nyumbani Libya liliwasilishwa na serikali mpya ya Libya, Baraza la Kitaifa la Mpito (NTC).

Bwana Mahmoudi ameelezea wasiwasi kuhusu usalama wake iwapo atasafirishwa hadi Libya.

Bwana Korchid, pia aliteta kuhusu hatua hiyo, akisema: "kama atapata matatizo yoyote nchini Libya, mfumo wa sheria wa Tunisia utakuwa umechangia katika matatizo hayo."

Bwana Mahmoudi, amekuwa waziri mkuu hadi pale Kanali Muammar Gaddafi, alipoondolewa madarakani mapema mwaka huu.

Mwezi Septemba alizuiliwa katika eneo la Tamaghza, Kusini mwa Tunisia, karibu na mpaka wa Algeria.

Alihukumiwa kifungo cha miezi sita gerezani kwa kuingia nchini humo kinyume cha sheria, uamuzi ambao ulibatilishwa baada ya kukata rufaa.

Hata hivyo, Bwana Mahmoudi baadaye alizuiliwa katika gereza karibu na mji wa Tunis akisubiri uamuzi juu ya ombi la kutaka yeye arejeshwe nyumbani, shirika la habari la AFP limeripoti.

Mwezi Agosti, Tunisia ilitambua rasmi NTC kama serikali ya Libya na imethibitisha kushirikiana nao katika masuala ya kiusalama.

Chanzo: BBC

Tetemeko la ardhi laporomosha hoteli

Waokowaji wakitafuta manusura

Waokozi wanajaribu kuwaokoa manusura waliokwama katika vifusi vya majengo baada ya tetemeko la ardhi la kipimo cha 5.7 kukumba mji wa Van, kaskazini mwa nchi ya Uturuki.

Majengo kadhaa yameporomoka wakati tetemeko hilo liligonga, ikiwemo hoteli moja la ghorafa sita.

Takriban wafanyakazi 100 wa kutoa misaada na waandishi wa habari wanaaminika walikuwa wanaishi katika hoteli hiyo.

Waandishi hao walikuwa katika eneo hilo kwa sababu ya tetemeko lingine lililokumba eneo hilo wiki mbili zilizopita, ambapo watu wasiopungua 500 walikufa.

Baadhi ya waandishi waliokwama wamekuwa wakituma ujumbe mfupi wa simu ya mkononi wakiomba usaidizi.

Akizungumza na BBC mbunge wa Uturuki, Nasmi Guhr, amasema '' Takriban majengo mengine 40 yameporomoka mjini Van na makundi ya waokozi wanajaribu kuokoa waliokwama''.

Picha za Televisheni kutoka Van zinaonyesha wakazi na waokozi wakijaribu kuinua vifusi ili kuwaondoa watu waliokwama katika majengo yaliyoporomoka.

Baadhi ya waandishi wa habari waliokwama katika majengo hayo wametuma ujumbe kupitia simu zao za mkononi wakiomba waokolewe.

Naibu wa Waziri Mkuu, Besir Atalay, amesema kuwa tetemeko hilo liliporomosha shule moja, nyumba kadhaa za udongo pamoja na hoteli

Chanzo: BBC